گؤزلری باتان اونوتقان خسته
انسان عاغلی دی بو سئوگیلی
چوخ زادلاری مین ایل سونرا بیله‌جک
مین ایل سونرادی دئییرم بونو سنه
محکم یاپیش الیمیزدن
یوخودان آییلیب گرچک لری گؤرر کیمی
ان ساده زادلاری اونودان خسته نین گؤزلری دی ایچیمیز
اوزون گؤتوروروک محیط ین
توز قونوب اوزوموزه
باتان آرزولاریمیزدان دانیشیرام
جمهوریت
طیاره سورمک ، ان سون مودئلی
مریخ ده
قلبی ایشله‌یرکن گؤرمک
آتان توفنگین بورنونا باخارکن شوخلوق ائلمک
اؤلوم دن اون دقیقه قاباغی و سونرانی بیلمک
هه
هه
یوخ
هه بیلیرم
تماماً آنلاییرام و آنلاماغا چالیشیرام
مین گؤزله‌مه یی گیزلدیرم قلبیمده
اؤنجه لری تهران هامینین ایدی
و حیوان لاری گؤرنده بو نه دی دئییردی انسان؟
ییغیشدیریرام اؤزوموسانسور ائله‌مه یی
و آیدین لارا قابارییانلاری آنلامیرام آخی
ادب اولسون دئیه بئینیمیره ایکی شاپالاق چیرپیرام
بو قولای کاماندیر
بدن دن ده موغایات اولا بیلمه‌ین بئیینلر
خارج دن پریزدئنت گتیرمک طرفداشی یام
اؤلمز ماشین لارین یئری هارادی؟
ایشینی دوزگون گؤرن معلیم لر هانکی شاگیرده یییه دی؟
طیاره مینیب اوزاقلاشیرام اورتا دوغودان
اوخویورام آنالارین اوره‌یین
قوشلارین و کپنک لرین آناسین دئییرم
بوتون جانلی لارین آناسین
محبوس لارین اوره یین
قابیل لرین
و اؤلموش گوناه کارلارین
آرزولاریم دان دانیشیرام
ان سون یاخشی آدامین اؤلوموندن اؤنجه نی و سونرانی کیتاب ائیله‌ییرم
و زمانی گتیره‌نه دک سکوت ائیله‌ییب چالیشماق
گوندردیییم مکتوبلاری بیر داها گؤندریرم .
ایچیمده‌کی بایاتی نی اوخویورام سنه بو دفعه :
من اویغورجایام ، یازیلارام ، اوخونارام
من اویغورجایام یازیمارام ، اوخونارام
من اویغورجایام نه یازیللام ، نه اوخوننام
هه
یوخ
بیلیرسن نه دئییرم آخی !
اؤزوموزو تحقیر ائدیریک بشر اولاراق بعضی زادلارلا
یورولمورام سنه فیکیرلشمک دن
هانسی اوشاغی یورولدوم دئیینده گؤروبسن آی بالام؟
کلمه سالادی دوغراسام دا گؤزلریمه باخ
گؤزلریمه
زهله‌م گئدیر آخماق قانقئستر لیک دن
بوتون کؤلگه‌لردن آزاد اولاراق ساچلارینی داراییرام
کوره یینین اورتاسیندا کی ناودانا باخیرام
یوخولاردان سونرادی صاباح
یوخولاردان اؤنجه دی
یوخو واختی دی بوگون
ایندی
شیلتاقلانیرام سنه
هه لریمیز یوخا دؤنور
یوخلاریمیز هه اولاندا
دوداقلارینی اؤپورم
قویمورسان یوخ
قویورسان
هردن ده یوخولاردان قاباق دی صاباح
چکدیییمیز اضطراب دی
اضطراب